రాజమౌళి సినిమా విలన్‌కి ఇంత ట్రోల్స్ ఎందుకు?..తల్లి ఎమోషనల్ కామెంట్స్!
మలయాళ స్టార్‌ హీరో పృథ్వీరాజ్ సుకుమారన్ ను ఇండస్ట్రీ నుంచి బయటకు పంపించేందుకు కొంతమంది కుట్రలు పన్నుతున్నారని,పెద్ద కుట్ర జరుగుతోందని ఆయన తల్లి, ప్రముఖ నటి మల్లిక సుకుమారన్ షాకింగ్ వ్యాఖ్యలు చేశారు. ఇటీవల ఒక మలయాళ మీడియాకు ఇచ్చిన ఇంటర్వ్యూలో ఆమె ఈ అంశంపై స్పష్టంగా మాట్లాడారు.
ప్రత్యేకంగా ఇటీవల జయన్ నంబియార్ దర్శకత్వంలో విడుదల అయిన ‘విలాయత్ బుద్ధ’ (Vilayath Budha) సినిమా తర్వాత పృథ్వీరాజ్ సుకుమారన్ పై ఆన్‌లైన్ ట్రోల్స్, సైబర్ బుల్లింగ్, వ్యక్తిగత దూషణలు ఈ కుట్రలో భాగమేనని ఆమె ఆరోపించారు.
ఇంకా, మల్లిక సుకుమారన్ మాట్లాడుతూ, మొదటగా, పృథ్వీ ఎదుగుదలను కొందరు జీర్ణించుకోలేక అతన్ని కించపర్చి, కిందికి లాగే ప్రయత్నాలు చేస్తున్నారు. అందువల్ల ఆయన కెరీర్‌ను పూర్తిగా నాశనం చేయాలని ప్లాన్ చేస్తున్నారు. మొదట్లో, పృథ్వీరాజ్‌పై కొన్ని దాడులు జరిగినప్పుడు అతడికి మద్దతు ఇచ్చేందుకు చాలా తక్కువ మంది మాత్రమే ముందుకొచ్చారు. తరువాత, సోషల్ మీడియాలో అతడిపై దుర్వచనాలు, టార్గెట్ చేసే కామెంట్లు ఎక్కువ అయ్యాయి. దీంతో నేను మౌనంగా ఉండలేను. ఇలాంటి నీచ చర్యలు ఆపకపోతే ప్రతిసారీ బయటకు వచ్చి పోరాడతాను’’ అని హెచ్చరించారు.
అయితే, పృథ్వీరాజ్ నటించిన తాజా చిత్రం ‘విలాయత్ బుద్ధ’ నవంబర్‌ 21 2025, న ప్రేక్షకుల ముందుకు వచ్చింది. జయన్ నంబియార్ దర్శకత్వం వహించిన ఈ యాక్షన్ థ్రిల్లర్‌లో అనుమోహన్, ధ్రువన్, వినోద్ థామస్ ప్రధాన పాత్రలు పోషించారు. అయితే విడుదలైన వెంటనే కొందరు ఈ సినిమాను ‘పుష్ప’తో పోల్చి భారీగా ట్రోల్ చేశారు. ఫలితంగా పృథ్వీరాజ్‌పై వ్యక్తిగత దాడులు మరింత ఎక్కువ అయ్యాయి.
మరోవైపు పృథ్వీరాజ్ కెరీర్ ఇప్పుడు పీక్‌లో ఉంది. పృథ్వీరాజ్ ప్రస్తుతం రాజమౌళి దర్శకత్వం వహిస్తున్న భారీ చిత్రమైన “వారణాసి “లో నటిస్తున్నారు. మహేశ్ బాబు హీరోగా చేస్తున్న ఈ గ్లోబల్ ప్రాజెక్టులో పృథ్వీరాజ్ ‘కుంభ’ అనే కీలక విలన్ పాత్రలో కనిపించనున్నారు.
ఈ సంఘటన మలయాళం, తెలుగు సినీ వర్గాల్లో భారీ చర్చనీయాంశంగా మారింది. పృథ్వీరాజ్ అభిమానులు ఇప్పుడు #WeStandWithPrithviraj ట్రెండ్‌తో సోషల్ మీడియాలో తనకి మద్దతు ఇస్తున్నారు.