ఆ నిర్మాత ఇంటర్వెల్‌లోనే వెళ్లిపోయారా? వారిపై నిర్మాత సీరియస్…
ఈటీవీ విన్ ఒరిజినల్ ప్రొడక్షన్‌గా వేణు ఊడుగుల మరియు రాహుల్ మోపిదేవి సంయుక్త నిర్మాణంలో తెరకెక్కిన రాజు వెడ్స్ రాంబాయి చిత్రాన్ని బన్నీ వాస్, వంశీ నందిపాటి ఘనంగా ప్రెజెంట్ చేశారు.
అయితే నవంబర్‌ 4 న విడుదలైన ఈ చిత్రం అఖిల్ రాజ్ హీరోగా, తేజస్వినీని హీరోయిన్ గా పరిచయం చేసింది. ఇప్పుడు సాయిలు కంపాటి దర్శకత్వంలో పల్లెటూరి ప్రేమకథను అద్భుతంగా ఆవిష్కరించిన ఈ సినిమా ప్రేక్షకుల గుండెల్లో శాశ్వత స్థానం సంపాదించుకుంది.
ఈ చిత్ర విజయం సందర్భంగా హైదరాబాద్‌లో మంగళవారం రాత్రి విజయోత్సవ వేడుక జరిగింది. ఈ వేడుకకు సినీ పరిశ్రమకు చెందిన పలువురు ప్రముఖులు అతిథులుగా వచ్చారు. వీరిలో కథానాయకుడు శ్రీ విష్ణు, దర్శకుడు బాబీ, రచయితలు కోన వెంకట్ మరియు బి.వి.ఎస్. రవి ప్రత్యేకంగా పాల్గొన్నారు.
ఈ సందర్భంగా నిర్మాత వేణు ఊడుగుల రాజు వెడ్స్ రాంబాయి నిర్మాణ ప్రయాణంలో ఎదుర్కొన్న అవమానాలను గుర్తుచేసుకున్నారు. ఆయన మాట్లాడుతూ నేను ఈ వేదికపై నిలబడటానికి కారణం ఈటీవీ విన్ అని అన్నారు.
అలాగే సినిమా విడుదలకు ముందే ఒక ప్రముఖ నిర్మాతకు, డిస్ట్రిబ్యూటర్‌కు మా చిత్రాన్ని చూపించాం. అయితే వాళ్లు మరో నలుగురితో వచ్చి ఇంటర్వెల్ అయిన వెంటనే మాకు ఏమీ చెప్పకుండా లేచి వెళ్లిపోయారు. తరువాత ఒక్క షో కూడా ఆడదు అంటూ మా సినిమాపై నెగెటివ్ ప్రచారం చేశారు.
అయితే ప్రివ్యూ షోకి వచ్చే వారు కనీసం సినిమా పూర్తయ్యే వరకు చూసి వెళ్లాలని కోరుతున్నా అంటూ చెప్పారు. కానీ ఈరోజు ప్రేక్షకులే మా సినిమాను హృదయపూర్వకంగా ఆదరిస్తున్నారు అన్నారు. ఈ సినిమా శ్రీ విష్ణు చేతులమీదుగా ప్రారంభమైంది అని వేణు ఊడుగుల చెప్పుకొచ్చారు.
హీరో శ్రీ విష్ణు మాట్లాడుతూ తను హీరో గా నటించిన సినిమా నీది నాదీ ఒకే కథ సమయంలో నేను, దర్శకుడిగా వేణు ఊడుగుల చాలామంది నిర్మాతల వద్దకు వెళ్లాం. చివరికి మేమే ఆ సినిమా చేసుకున్నాం. ఆ కోపంతోనే వేణు నిర్మాత అయ్యాడేమో అంటూ… వేణు వద్ద ఉన్న కథలు తెలుగు సినిమాకి చాలా అవసరం అన్నారు. అలాగే ప్రేక్షకులు కోరుకునే కంటెంట్‌ను ఈటీవీ విన్ ఎంచుకుంటోంది అని అన్నారు.
అలాగే ఈటీవీ విన్ బిజినెస్ హెడ్ సాయికృష్ణ మాట్లాడుతూ పల్లెటూరి నేపథ్యంతో ఉన్న ఈ సినిమాను అందరికీ అందుబాటులో ఉంచాలని టికెట్ రేట్లు తగ్గించాం. త్వరలో సాంప్రదాయిని సుప్పిని సుద్దపూసని చిత్రంతో మళ్లీ ప్రేక్షకుల్ని కలుస్తాం అన్నారు.
ఇప్పటి వరకూ ఈ చిత్రం మొదటి నాలుగు రోజుల్లో బాక్సాఫీస్ వద్ద మంచి కలెక్షన్లు సాధించి, ఇండియా నెట్‌గా సుమారు ₹7.20 కోట్లు రాబట్టింది. ఇక సినిమా ఇంకా ఎంత దూరం వెళ్తుందో చూడాలి.