శ్రియా శరణ్ హెల్ప్ అంటుందా? అదితి షూట్ అంటుందా? రెండూ నకిలీ – అసలు కథ ఏంటి?

ఈ మధ్య సెలబ్రిటీల పేరుతో సైబర్ మోసాలు రోజుకో కొత్త రూపం తీసుకుంటున్నాయి. ఒక్కసారి ఫేక్ వాట్సాప్ నంబర్ తయారు చేసి, ఆ స్టార్ ఫోటో పెట్టి అభిమానుల గుండెల్లో ఆశలు నింపి, జేబులు ఖాళీ చేస్తున్నారు మోసగాళ్లు. ఇది ఇప్పుడు సినీ ఇండస్ట్రీలో ఓ భయానక ట్రెండ్ అయిపోయింది.

అదితి రావు హైదరి కేసు ఇంకా చల్లారకముందే ఇప్పుడు మన తెలుగు అందాల తరంగిణి శ్రియా శరణ్ కూడా ఇదే బాధను అనుభవిస్తోంది. ఆమె పేరు, ఆమె అందమైన ఫోటోలతో ఒక ఫేక్ వాట్సాప్ నంబర్ సృష్టించి, ఆమె సన్నిహితులకు, ఇండస్ట్రీ ఫ్రెండ్స్‌కి మెసేజ్‌లు పంపుతున్నారట మోసగాళ్లు. నాకు పని కావాలి హెల్ప్ చేయండి అని నటించి, జాలి పడేలా చేస్తున్నారు.

అయితే శ్రియా ఓర్చుకోలేకపోయింది. తన ఇన్‌స్టాగ్రామ్‌లో ఆ ఫేక్ నంబర్ స్క్రీన్‌షాట్ పెట్టి రెడ్ అలర్ట్ ఇచ్చేసింది. అంతేకాకుండా ఎవడో పిచ్చోడు నా పేరుతో డ్రామా ఆడుతున్నాడు. ఇది నేను కాదు బాబూ ఆ నంబర్ నాది కాదు. ఇతరుల సమయం వృథా చేయకుండా వాడు తన జీవితం చూసుకోవాలి. మీరు కూడా మోసపోకండి. ఎవరైనా ఇలా మెసేజ్ చేస్తే రిప్లై ఇవ్వొద్దు, డబ్బులు పంపొద్దు అంటూ గట్టిగా హెచ్చరించింది.

అదే దారిలో నడిచింది అదితి రావు హైదరి కూడా. కొద్ది రోజుల క్రితమే ఆమె పేరుతో ఫేక్ నంబర్లు తయారై, ఫోటోగ్రాఫర్లకు షూట్ కోసం రండి అంటూ మెసేజ్‌లు వెళ్తున్నాయి. అదితి స్ట్రెయిట్‌గా చెప్పేసింది నేను ఎవరికీ వ్యక్తిగతంగా వాట్సాప్‌లో మెసేజ్ చేయను. అన్నీ నా టీమ్ ద్వారానే జరుగుతాయ్. సందేహం వస్తే అధికారిక ఇన్‌స్టా లేదా టీమ్‌కి చెప్పండి అంది.

ఇలాంటి ఘటనలు ఒకటా రెండా? రోజూ ఎవరో ఒక స్టార్ పేరు మీద ఇలాంటి డ్రామాలు జరుగుతున్నాయి. ఇక మీరు, నేను అందరూ జాగ్రత్తగా ఉండాలి. చివరగా ఒక్క మాట – స్టార్స్‌ని ఇష్టపడటం మంచిది… కానీ అంధంగా నమ్మొద్దు. ఈ డిజిటల్ యుగంలో జాగ్రత్తే బెస్ట్ ఫ్రెండ్.