“చిరంజీవి నుంచి శ్రీలీల వరకూ… ఎవరినీ వదలరా? హైపర్ ఆది ఫైర్!”

సుమ ప్రధాన పాత్రలో నటించిన ‘ప్రేమంటే’ సినిమా ప్రీ–రిలీజ్ ఈవెంట్… అభిమానులు, సినీ ప్రముఖులు నిండిన ఆ హాల్లో ఒక్కసారిగా వాతావరణం మారిపోయింది. మైక్ పట్టుకున్న హైపర్ ఆది సాధారణ కామెడీ కాదు, ఇండస్ట్రీ మనసులో పేరుకుపోయిన బాధనే బయటపెట్టాడు. మాటలు కాదు—మనసులో దాచుకున్న ఆవేదనే ఒక్కసారిగా పేలిపోయింది.

తెలుగు సినిమాను ప్రపంచానికి గర్వంగా పరిచయం చేసిన రాజమౌళి వంటి మహానీయుడిని కూడా ట్రోలింగ్ చేయటం చూస్తుంటే మనసు ముక్కలవుతుందని, ఈ రోజుల్లో సోషల్ మీడియా ఒకరి కష్టం, అంకితభావం, కళాత్మకత అన్నింటినీ తేలికగా తీసేస్తోందని ఆది తీవ్రంగా స్పందించాడు. “అనుకున్న సమయంలో గ్లిమ్స్ ప్లే కాలేదని ఎమోషనల్ అయ్యారు—that’s pure passion! దాన్నీ ట్రోల్ చేస్తున్నారా?” అంటూ స్టేజ్‌పైనే విరుచుకుపడ్డాడు. రామాయణం, మహాభారతం పట్ల ప్రేమతో జీవించే రాజమౌళి హనుమంతుడిని అవమానించాడని ప్రచారం చేయడం తనకే అవమానంగా అనిపిస్తుందని ఆది తేల్చి చెప్పాడు.

ఆది అక్కడితో ఆగలేదు ఇంకా టాలీవుడ్ స్టార్ హీరోలపై జరుగుతున్న ట్రోలింగ్ సంస్కృతిని చూసి అస్సలు సహించలేకపోతున్నట్టు తేటతెల్లం చేశాడు. “ఎన్‌.టీ.ఆర్ గారు సినిమా కోసం సన్నబడినా ట్రోల్… బాలయ్య గారు మాట్లాడినా ట్రోల్… అల్లు అర్జున్ నవ్వినా కూడా ట్రోల్… సాయిధరమ్ తేజ్ ఆక్సిడెంట్ తర్వాత మాటల కోసం పోరాడుతున్నప్పటికీ దానిపై కూడా ట్రోలింగ్… ఏమిటీ ఇది? మనిషితనం ఎక్కడికి పోయింది?” అని ఆది ప్రశ్నించాడు. హాల్లో కూర్చున్న వారికే జవాబు రాకపోయేలా విరుచుకుపడ్డాడు. ‘బాహుబలి’తో ఇండియన్ సినిమాని ప్రపంచవ్యాప్తంగా గుర్తింపు తీసుకొచ్చిన ప్రభాస్‌ లుక్స్‌ పై కూడా  ట్రోల్… కొత్తగా వచ్చిన ‘చికిరి చికిరి’ రామ్ చరణ్  పాట స్టెప్స్ మీదే  కూడా ట్రోలింగ్ చేస్తుంటే… అది ఇండస్ట్రీకి ఎంత బాధ కలిగిస్తుందో ఎవరికీ అర్థం కావడం లేదు” అని ఆది ఆవేదన వ్యక్తం చేశాడు. వరస అపజయాలతో ఉన్న విజయ్ దేవరకొండను రీకవరవ్వడానికి కొంత సమయం ఇవ్వకుండా పర్సనల్ గా ట్రోల్ చేస్తున్నారు.. ఎందుకింత దారుణమైన మనస్తత్వం?” అని గట్టిగా ప్రశ్నించారు.

అత్యంత దారుణమైన విషయం ఏమిటంటే మూడున్నర దశాబ్దాలుగా నెంబర్ వన్ గా నిలబడిన మన మెగాస్టార్ చిరంజీవి పై కూడా డీప్‌ఫేక్ వీడియోలు చేయడం అత్యంత నీచమైన పని అని హైపర్ ఆది అభిప్రాయపడ్డారు.

సౌత్ నుంచి బాలీవుడ్‌ వరకూ తన ప్రతిభను చాటుకుంటున్న శ్రీలీల కు యాక్టింగ్ రాదని, డాన్స్ మాత్రమే చేస్తది! అని విమర్శించడం అజ్ఞానమని చెప్పుకొచ్చారు. నేషనల్ అవార్డు వచ్చిన ‘భగవంతు కేసరి’ విజయానికి బాలయ్య, అనిల్ రావిపూడి మాత్రమే కాదు, శ్రీలీల నటన కూడా కారణమేనని గుర్తుచేశారు.

ఇలాంటి నిర్లక్ష్యమైన, అసహనకరమైన ట్రోలింగ్ వల్లే తెలుగు సినిమాలు నష్టపోతున్నాయని, తెరపై చూపించే హీరోయిజం కూడా కామెడీగా కనిపిస్తున్నదని హైపర్ ఆది వ్యాఖ్యానించారు. మనం మన సినిమా, మన స్టార్‌లను కాపాడుకోవాలంటే ముందు ట్రోలింగ్ సంస్కృతి తగ్గాలని ఆది స్పష్టం చేశారు.